Adaab,
Bohut shukriya tareef ke liye, yeh aap ki inayat hai hum par ke aap 'Seekh
Liya' padh kar apne jazbaat bayaan kare hum se. Ek aur nazm pesh kar raha
hoon aap ko, aap ke khayalon ka behad intezaar rahega...

Kisi ki nazar se apni nazar hai, kisi ki reh guzar par apna safar hai,
Bekhabar sa hoon main magar, ke jaanta bhi nahi kaun woh humsafar hai
Jise dekha bhi nahi, jise suna bhi nahi, wohi dildaar se mohabbat hogayee hai

Na chaahta huun koi mahjabeen, na chaahta huun koi nazneen
Par chaahta hoon woh ek haseen, jo dila de dil ko mujhpar yaqeen
Kisi ki intezaar se mohabbat hogayee hai, Kisi ki aitebaar se mohabbat
hogayee hai

Kisi ki hasraton ki ghunghat mein chupeegi apni hayaat
Kisi ki halki si muskurahat se muskuraaeegi apni hayaat
Jis mein khil jaaye mera chaman, wohi bahaar se mohabbat hogayee hai

Jis ke saath manzilon ke silsiley ho, Jis ke aankhon mein hoslon ke qafilein ho
Jis ke baahon mein zindagi ki haraarat ho, Jis ke chehre par noor ki baraat ho
Jis ke angaan mein mere phool khile, wohi gulzaar se mohabbat hogayee hai

__________________
Follow me on Twitter & Facebook